ስለ ደን ዛፍ ምርጥ ዘሮች ሰምተው ያውቃሉ? እርግጥ ነው ምርጥ ዘር ከሰብል እህል ጋር በተያያዘ ይታወቃል፡፡ አሉታዊ የአየር ንብረት ለውጥ ተጽዕኖዎችን ለመቋቋም አለማችን ደን ለማልማት የሚያስችሉ አዳዲስ ግኝቶችን እያስተዋወቀች ነው፡፡ የአየርንብረትን ለማሻሻል ከሚረዱ ከእነዚህ መንገዶችም አንደኛው የደን ዛፍ ምርጥ ዘሮችን መጠቀም ነው፡፡
ይህ ጥረትም በኢትዮጵያ ተጨባጭ ለውጦችን ማስገኘቱን ባለሞያዎች ይናገራሉ፡፡ በመሆኑም በዚህ ረገድ ሊነሳ የሚችለው ጥያቄ ምርጥ ዘሮቹ በኢትዮጵያ የደን ሽፋንን ለማሳደግ የሚደረጉ ጥረቶችን ምን ያህል እገዛ አድርገዋል የሚለው ነው፡፡
ዶክተር ይጋርዱ ሙላቱ በኢትዮጵያ የአካባቢና የደን ምርምር ኢንስቲትዩት የዛፍ ዘር ቴክኖሎጂ ማስተባሪያ ዳይሬክተር ናቸው፡፡ እሳቸው እንደሚሉት ከሆነ ድርጅቱ ከተቋቋመ ጀምሮ የዛፍ ዘር ጥራት ደረጃ በ11 እጥፍ አድጓል፡፡